Cerita Lucu Boso Jowo : Pitik Mogok mangan
Thursday 20 April 2017
Edit
Bar nganakke pengajian Sarmi ngresiki
ruang tamu karo njukuki turah-turahan suguhan sing ora dipangan karo tamune.
Salah suwijining panganan yaiku getuk sajake wis rada lawas. Getuk iku akeh
sing kur dicokot sithik karo tamune, ora dienthekake. Sarmi ngambu getuk kuwi, banjur celathu menawa getukne wis rada
banger. Apike dipakakke pithik wae. Ndilalahe pithike Sarmi krungu omongan iku
banjur grenengan marang kancane
Pithik Blorok:
Wah getuk sing wis mambu kae mesthi
dipakakke aku
Pithik Putih:
Loh njuk ngapa tho?
Pithik Blorok:
Awake dhewe wiwit mbiyen dipakani
sing mambu-mambu terus, ora tau sing enak-enak. Mbok pisan-pisan ora sah
dienteni mambu!. Makani barang apik ora iso popiye?
Pithik Putih:
Hooh bener Blo!. Awake dhewe kur
diwenehi turah-turahan. Nek ngono mengko ethok-ethok ora doyan mangan
wae po?
Pithik Blorok:
Bener Put!. Engko nek diwenehi getuk
dieker-eker wae rasah dipangan.
^_^
Wasan rampung ngresiki ruang tamu, Sarmi
njukuk getuk sak gegem, diuncalke ning lemah ben dipangan pithike.
Ananging pithik loro kuwi malah kur ngeker-eker getuk nganthek sumebar
tekan ngendi-endi. Babar pisan ora gelem mangan.
Weruh pithike ora doyan getuk, Sarmi
banjur njukuk sega mambu ning pawon. Segane dilebokake ning trempolong ben
dipangan pithike. Nanging pithike malah kur nendang-nendang trempolong nganthek
segane tumplak. Sarmi bingung, apa sebape pithike ora gelem mangan?.
Untunge dheweke kelingan nduwe roti
tawar lawas sing wis njamur. Mbok menawa pithike doyan roti. Rotine
dijukuk ning nduwur meja, banjur dioncalke ning ngarepe pithike. Ternyata padha
wae nasibe karo getuk banger lan sega mambu. Roti jamuran iku blas ora dipangan
karo pithike. Malah ditendang-tendang ngantek kontal ning ndalan. Sarmi kaget
marang pokale pithike.
Dumadakan Adhine Sarmi metu saka
omah karo nuntun Ponakane sing melet-melet kepedesen merga mangan
arem-arem. “Kowe ki durung doyan pedes Le, wis dilepeh wae
arem-areme” celathune marang Ponakane. Weruh mbokne ponakane
yaiku Jarwo metu saka omah, Sarmi banjur cerita menawa pithike dho ora doyan
mangan.
Jarwo:
Wooo, sajake pithikmu padha gering
ki, saiki lagi musim Penyakit Tetelo loh!
Sarmi:
Wooo ngono tho, nek ngono digolekke
obat apa ya?
Jarwo:
Rasah diobati. Dibeleh wae. Soale
mengko malah nulari kanca-kancane.
Pithik Blorok kaget banget
krungu usulan dheweke dibeleh wae. Blorok tambah kaget wasan weruh Pithik
Putih ujuk-ujuk notholi lepehan arem-arem.
Pithik Blorok:
Kowe ki piye tho ? Awake dhewe wis
nolak mangan sega, kok malah trima mangan lepehan arem-arem ki piye. Rak yo
luwih njijiki tho?.
Pithik Putih:
Timbangane dibeleh, aku milih
mangan lepehan arem-arem wae. Ben kowe wae sing ora doyan mangan luwih
pantes dibeleh...
Pithik Blorok:
Enak wae. Aku ya ora gelem
dibeleh ki..... (Pithik Blorok banjur
cepet-cepet melu notholi lepehan arem-arem karo mripate merem amarga jijik)
Pithik loro kuwi rebutan ngentekke
lepehan arem-arem. Sarmi lan Jarwo dadi gumun. Pithik sing mau ora
doyan getuk, sega lan roti kok saiki malah rebutan lepehan arem-arem. Lucu
tenan pithik jaman saiki
Demikian cerito boso jowo pitik mogok mangan, mugo-mugo terhibur